Karlar reykja meira og drekka meira en konur en það er ekki ástæðan fyrir að þeir eiga frekar á hættu að fá krabbamein. Ástæðan er eðlislægur líffræðilegur munur á kynjunum.

Þetta eru niðurstöður nýrrar rannsóknar sem náði til 300.000 miðaldra og eldri Bandaríkjamanna, karla og kvenna. Daily Mail segir að niðurstaðan hafi verið að karlar séu tvisvar sinnum líklegri til að fá krabbamein en konur. Það átti einnig við þegar búið var að taka tillit til lífsstílsþátta.

„Þetta bendir til að það sé eðlislægur líffræðilegur munur á kynjunum og að það hafi áhrif á næmni þeirra fyrir krabbameini,“ sagði Dr Sarah Jackson, farsóttafræðingur við the National Cancer Institute.

Daily Mail segir að vísindamenn telji að munur á genum, hormónum og ónæmiskerfinu leiki ákveðið hlutverk í þessum muni á milli kynjanna.

Vísindamennirnir rannsökuðu tíðni 21 tegundar krabbameins í 171.274 körlum og 122.826 konum. Fólkið var á aldrinum 50 til 71 árs og náði rannsóknin yfir tímabilið 1995 til 2011.

Skjaldkirtils- og gallblöðrukrabbamein var algengara meðal kvenna en allar aðrar tegundir krabbameins voru algengari hjá körlum. Kynbundið krabbamein, til dæmis leghálskrabbamein og blöðruhálskrabbamein, var ekki tekið með í rannsókninni.

Niðurstöður rannsóknarinnar hafa verið birtar í vísindaritinu CANCER.