Low Choo Choon, sem býr í Malasíu, og eiginkona hans höfðu ákveðið að láta jarðsetja sig hlið við hlið og höfðu tryggt sér grafstæði. Síðar gaf Low ættingja sínum grafstæðið því sá hafði ekki efni á að kaupa sér hinsta hvílustaðinn.

Þegar hann fór að leita að afsalinu fyrir grafstæðinu fann hann það hvergi. Hann fór því á lögreglustöð til að tilkynna stuld á því. Þegar hann ræddi við lögreglumenn fékk hann fréttir sem voru honum mikið áfall. Hann var nefnilega skráður sem „látinn“ í tölvukerfi lögreglunnar og öðrum opinberum skrám.

Low, sem er 71 árs og starfar hjá útfararþjónustu, fékk þau ráð að kvarta til skráningarráðuneytis landsins.

Harian Metro segir að enn sé ekki búið að lagfæra þessa skráningu og því hafi Low leitað til fjölmiðla í þeirri von að embættismenn taki nú við sér og lagfæri hana.

Hann hefur nú verið „látinn“ í átta mánuði og því fylgja margvísleg vandamál þegar kemur að samskiptum við hið opinbera.

Hann fékk ekki að kjósa í kosningum í mars. Það sem veldur honum mestum áhyggjum núna er að ökuréttindi hans renna úr gildi í september og það kemur sér mjög illa fyrir hann því hann sér oft um að aka líkbíl útfararþjónustunnar.