Þann 2. apríl síðastliðinn var Leah Jayde, 2 ára, í baði. Faðir hennar Daniel James Gallagher ákvað þá að bregða sér aðeins frá til að fá sér að reykja og kíkja á Facebook. Þegar hann yfirgaf baðherbergið var vatn enn að renna í baðkarið. Þegar hann sneri aftur sjö mínútum síðar var Leah dáin, hafði drukknað.

Mirror skýrir frá þessu og segir að Daniel hafi nú verið dæmdur í fimm ára fangelsi fyrir að hafa verið valdur að dauða Leah.

Fram kemur að þegar hann kom aftur inn í baðherbergið hafi Leah legið með höfuðið niður í vatnið. Hann reyndi strax að endurlífga hana og hringdi eftir aðstoð. Sjúkrabíll kom skömmu síðar að heimili hans í Queensland í Ástralíu. En því miður reyndist ekki unnt að bjarga lífi Leah.

Í réttarhöldunum kom fram að þetta var ekki í fyrsta sinn sem Daniel skildi Leah eftir eina í baði. Nokkrum dögum áður hafði hann skilið hana eftir eina í 10 til 12 mínútur á meðan hann var að laga rafmagnið í húsinu. Í það skiptið var það móðir Leah sem kom að henni einni í baðkarinu. Hún og Daniel skildu fyrir tveimur árum.