Elstu mannvistarleifarnar, sem hafa fundist, eru því enn eldri en áður var talið. Talið var að þær væru rúmlega tveggja milljóna ára gamlar en samkvæmt niðurstöðum nýrrar rannsóknar eru þær rúmlega þriggja milljóna ára gamlar. Þetta eru steingervingar úr Sterkfontainhellunum í Suður-Afríku en þeir hafa verið kallaðir „Vagga mannkynsins“.
The Guardian skýrir frá þessu.
Það var árið 1947 sem fornleifafræðingar fundu leifar af beinagrind af forföður homo sapiens, Australopithecus, í helli nærri Jóhannesarborg. Beinagrindin fékk nafnið „Frú Ples“.
Í fyrstu var talið að beinagrindin væri 2,1 til 2,6 milljóna ára gömul. En Laurent Bruxelles, einn höfunda nýju rannsóknarinnar, segir að beinagreindin sé að minnsta kosti einni milljón ára eldri. Hann sagði ótrúlegt að sjá beinagrind í svona góðu standi eftir svona langan tíma.
Það var fundur annarrar, næstum því fullkominnar Australopithecusbeinagrindar í Sterkfontain 1994 sem kom vísindamönnunum á sporið. Sú hefur verið nefnd „Litli-fótur“.
Þetta er heillegasta og stærsta forsögulega beinagrindin sem fundist hefur til þessa. Talið er að hún sé 3,7 milljóna ára gömul. Á þeim grunni töldu vísindamenn litlar líkur á að „Frú Ples“ væri svona miklu yngri. Af þeim sökum var gerð ný aldursgreining á „Frú Ples“ og leiddi hún í ljós að beinagrindurnar voru mun nær hvor annarri í aldri en áður var talið.
