Miklir þurrkar hafa herjað á norðurhluta Ítalíu undanfarna mánuði og hafa íbúar á svæðinu ekki glímt við svona slæma þurrka í 70 ár. Reiknað er með að þurrkarnir muni hafa mjög alvarleg áhrif á landbúnað á svæðinu og að verð á ýmsum landbúnaðarafurðum þaðan muni hækka um allt að 50%.

The Guardian segir að þurrkarnir hafi mikil áhrif á hrísgrjónarækt en grjón, sem eru notuð í rísottó, eru ræktuð á norðanverðri Ítalíu. Auk þess er ólífurækt í hættu sem og tómatræktun.

Margir innflytjendur reikna með að verð á tómötum og hrísgrjónum muni hækka um allt að 50% og reyna því að finna nýja birgja.

Bændur í Pódal, þar sem arborio hrísgrjón, sem eru notuð í rísottó, eru ræktuð hafa varað við „miklum uppskerubresti“ vegna þurrkana.

Sumir sérfræðingar reikna með að ólífuolíuframleiðsla muni dragast saman um 20 til 30% miðað við síðasta ár. Ekki bætir það ástandið að spænskir bændur reikna með 15% minni framleiðslu í ár en á síðasta ári en þeir glíma einnig við mikla þurrka.