Hin látnu hétu Ross Mtangi, fertugur verðbréfamiðlari hjá Credit Suisse Group AG, Julia Ghahramani, 26 ára lögfræðingur, og Amanda Scher, 36 ára starfsmaður félagsþjónustunnar.
Saksóknarar segja að öll hafi þau pantað kókaín hjá Billy Ortega sem skipulagði sölu fíkniefna á heimili sínu og sendi til kaupenda.
Það var Kaylen Rainey sem sá um að færa kaupendunum fíkniefnin að sögn saksóknara. Þeir segja að það styðji þessa fullyrðingu þeirra að Rainey búi í íbúð sem er skráð í eigu fjölskyldu Ortega.
Það sem Mtangi, Ghahramani og Scher vissu ekki var að búið var að blanda fentalýni saman við kókaínið. Það var það sem varð þeim að bana. Seljendur blanda fentalýni saman við kókaín til að auka virkni þess og gera það meira ávanabindandi. Örlítið magn af fentalýni getur orðið óvönum notanda að bana.
Mál Ortega og Rainey eru nú fyrir dómi í New York en þeir eru ákærðir fyrir að hafa orðið fólkinu að bana og sölu fíkniefna. Þeir neita báðir sök. Þeir hafa áður komið við sögu lögreglunnar því 2016 voru þeir handteknir fyrir rán.
Saksóknarar byggja ákærurnar meðal annars á gögnum um símanotkun hinna látnu og hinna ákærðu. Hin látnu sendu pantanir í símanúmer þeirra og skömmu síðar var Rainey kominn til þeirra með fíkniefni. Á myndbandsupptökum sést hann koma til þeirra.
