Samkvæmt niðurstöðu greiningar enska rannsóknarfyrirtækisins Airfinity þá má reikna með að ein milljón Kínverja smitist af kórónuveirunni daglega og að um 5.000 látist daglega af hennar völdum.

Þetta eru þær tölur sem blasa við þegar Kínverjar fara inn í það sem er talið vera stærsti faraldur veirunnar í heiminum til þessa að sögn Bloomberg.

Segir Bloomberg að ástandið geti orðið enn verra fyrir þetta fjölmenna ríki en þar búa um 1,4 milljarðar.

Í greiningunni segir að í janúar geti dagleg smit verið um 3,7 milljónir og í mars verði þau komin í 4,2 milljónir.

Á miðvikudaginn sögðu kínversk yfirvöld að 2,996 ný tilfelli hefðu greinst og að 10 hefðu látist af völdum COVID-19 frá því í byrjun desember.

Tedos Adhanom Ghebreyesus, forstjóri Alþjóðaheilbrigðismálastofnunarinnar WHO, hvatti í gær kínversk stjórnvöld til að veita nákvæmar upplýsingar um stöðu mála í landinu af völdum veirunnar.