Mjög margir ferðamenn hafa lagt leið sína til borgarinnar í ár og reiknað er með að tekjurnar af komu þeirra verði um 18 milljarðar evra sem er um þremur milljörðum meira en gert var ráð fyrir í upphafi árs.
Það er auðvitað gott að fá svona innspýtingu í hagkerfið en þessum mikla ferðamannafjölda fylgja einnig ákveðin vandamál.
Margar af fornminjum borgarinnar, eins og til dæmis Akropolis, verða fyrir áhrifum af komu allra þessara ferðamanna. Akropolis er rúmlega 2.000 ára og er á Heimsminjaskrá UNESCO.
The Guardian hefur eftir Peter DeBrine, ráðgjafa hjá UNESCO, að aðvörunarljósin blikki. Það verði að spyrja hversu margir ferðamenn séu of margir þegar rúmlega 16.000 manns heimsæki Akropolis daglega. Það séu of margir.
Hann segir að rannsóknir sýni að ferðamenn vilji í sífellt meiri mæli geta valið um sjálfbæra möguleika þegar kemur að áfangastöðum. Af þeim sökum telur hann að grísk yfirvöld verði að grípa til aðgerða til að koma í veg fyrir að of margir ferðamenn heimsæki Akropolis. Til dæmis sé hægt að selja aðgöngumiða á netinu til að tryggja að ekki komi of margir ferðamenn þangað daglega.
