Karlmaður á fimmtugsaldri var skotinn til bana af lögreglunni í Troms í Noregi í nótt. Þetta átti sér stað við heimili í Tennevoll í Lavangensveitarfélaginu.

TV2 skýrir frá þessu og segir að lögreglan hafi verið kölluð að heimilinu í nótt til að aðstoða heilbrigðisstarfsfólk og hafi lögreglumenn verið komnir þangað klukkan 01.40.

Ákveðnar aðstæður komu upp á vettvangi sem urðu til þess að lögreglumenn skutu á manninn en þá ók hann hjólaskóflu.

Maðurinn var úrskurðaður látinn á vettvangi.

Lögreglumennina sakaði ekki.

Rannsókn er hafin á málinu og annast sérstök rannsóknarnefnd hana.