Horn nashyrninga eru styttri nú en fyrir öld að sögn vísindamanna. Þeir segja að þetta geti verið afleiðing af veiðum á nashyrningum, bæði vegna löglegrar veiði og vegna veiðiþjófa. Þeir hafi einfaldlega beint sjónum sínum  að dýrum með stór horn.

The Guardian skýrir frá þessu og segir að nashyrningahorn hafi öldum saman verið eftirsótt af veiðimönnum en veiðiþjófar selji þau nú aðallega til Kína og Víetnam þar sem þau eru notuð í lyf.

Oscar Wilson, doktorsnemi við Helsinki háskóla og aðalhöfundur nýju rannsóknarinnar, sagði að fólk hafi venjulega viljað stærstu hornin. Veiðiþjófar fái hærra verð fyrir stór horn.

Hann og meðhöfundar rannsóknarinnar segja að við skoðun á myndum og teikningum af nashyrningum megi ráða að horn þeirra séu styttri nú en fyrir öld síðan miðað við líkamsstærð þeirra. Gögnin, sem unnið var úr, eru í vörslu Rhino Resource Center í Utrecht í Hollandi. Elstu gögnin eru frá sextándu öld.

Svipuð þróun hefur átt sér stað hjá fílum og villtu sauðfé.

Í grein, sem vísindamennirnir skrifuðu í vísindaritið People and Nature, segja þeir að veiðar á dýrum með stór horn eða fílabein hafi valdið því að dýr með minni horn og tennur hafi sloppið betur og hafi náð að  fjölgað sér og afkvæmi þeirra erft það að fá lítil horn. Þarna hafi orðið þróunarleg breyting.