Niðurstöður nýrrar rannsóknar sýna að eftir að konur hafa samfarir í fyrsta sinn þá eykst ónæmisviðbragðið í leggöngunum. Þetta kemur fram í fréttatilkynningu frá vísindaritinu eLife að sögn Videnskab.
95 unglingsstúlkur frá Kenía tóku þátt í rannsókninni. Þær létu allar í té sýni úr leggöngunum og leghálsi. Auk þess skýrðu þær frá hvort þær hefðu haft samfarir og ef svo var, hvenær.
Með nánari rannsóknum og samanburði komust vísindamennirnir að athyglisverðum hlut um stúlkurnar sem höfðu byrjað að stunda kynlíf síðasta árið. Í kynfærum þeirra varð mikil aukning á prótínum sem stýra ónæmisviðbrögðum, þar á meðal IL-1β, IL-2 og CXCL8.
Vísindamennirnir gengu að sjálfsögðu úr skugga um að þessar breytingar ættu ekki rætur að rekja til þungunar eða kynsjúkdóma.
Kynsjúkdómar voru eiginlega meginviðfangsefni rannsóknarinnar því vísindamennirnir höfðu lengi reynt að komast að því af hverju stúlkur og konur á aldrinum 15 til 24 ára eru í meiri hættu á að fá kynsjúkdóma en konur eldri en 25 ára.
Í raun ætti aukið ónæmisviðbragð í kynfærunum að beina sjónum vísindamann annað í leit að skýringu en hugsanlega eru óheppileg tengsl þarna á milli. Hið aukna ónæmisviðbragð getur nefnilega hugsanlega laðað að sér svokallaðar CD4 T-ónæmisfrumur en þær eru eitt af uppáhaldsskotmörkum HIV-veirunnar.
Ef svo er, á geta tilraunir líkamans til að vernda sjálfan sig leitt til þess að konurnar eru í meiri hættu á að smitast af HIV.
En ekki er hægt að staðfesta það með þessari rannsókn að sögn Alison Roxby, eins höfunda hennar.
