Sérfræðingar vara við því að Evrópa standi frammi fyrir „krabbameinsfaraldri“ ef ekki verður gripið til skjótra aðgerða til að efla rannsóknir og meðferð sjúklinga. Talið er að ein milljón tilfella hafi ekki greinst vegna heimsfaraldurs kórónuveirunnar.

The Guardian skýrir frá þessu. Heimsfaraldur kórónuveirunnar og sú áhersla sem var lögð á baráttuna við hann afhjúpaði „veikleika“ í heilbrigðiskerfinu og í krabbameinsrannsóknum um alla Evrópu. Ef ekki verður brugðist skjótt við munu álfubúar færast næstum áratug aftur á bak hvað varðar krabbameinsrannsóknir og meðferðir að sögn sérfræðinga.

Í nýrri skýrslu, European Groundshot – Addressing Europe‘s Cancer Research Challenges, kemur fram að til að varpa betra ljósi á umfang vandans þá segist vísindamenn telja að ein milljón krabbameinstilfella hafi ekki verið greind á meðan heimsfaraldurinn geisaði. Sífellt fleiri vísbendingar komi fram um að hærra hlutfall sjúklinga greinist með krabbamein á síðari stigum en var áður en heimsfaraldurinn skall á. Þetta sé afleiðing hægagangs í greiningum og meðferðum. Þetta muni valda álagi á evrópsk heilbrigðiskerfi næstu árin.

Rannsóknin leiddi í ljós að á fyrsta ári heimsfaraldursins ræddi heilbrigðisstarfsfólk við 1,5 milljónum færri krabbameinssjúklinga og annar hver krabbameinssjúklingur fékk ekki viðeigandi skurðaðgerð eða lyfjameðferð í tíma. Um 100 milljónir rannsókna voru ekki gerðar og talið er að afleiðingin af því geti verið að um ein milljón Evrópubúa sé með ógreint krabbamein.