The Guardian skýrir frá þess og segir að þegar lögreglumenn, frá US Marshals Service, komu heim til Leonard Francis, einnig þekktur sem „Fat Leonard“ sunnudaginn 04. september hafi þeir fundið staðsetningarbúnað, sem hann átti að hafa um ökklann, í húsinu en ekki Leonard. Hann var flúinn. Tímasetningin var kannski engin tilviljun því kveða átti upp dóm yfir honum tveimur vikum síðar. Þrír synir, hans sem bjuggu með honum, voru einnig horfnir.
Tilkynningar voru strax sendar til hafna, flugvalla og að landamærunum við Mexíkó um flóttann. Lögreglan telur að Leonard hafi þá þegar verið kominn úr landi.
Hann var handtekinn 2013 á hóteli í San Diego í aðgerð á vegum alríkislögreglunnar. Hann hafði játað sök hvað varðar umfangsmikla svikastarfsemi. Hann hafði dælt mat, áfengi og vændiskonum í yfirmenn hjá sjóhernum gegn því að herskip, allt upp í flugmóðurskip, væru send til þjónustu hjá Glenn Defense Marine Asia, sem er fyrirtæki í hans eigu í Singapore, til þjónustu og viðhalds.
Talið er að þetta hafi kostað sjóherinn 35 milljónum dollara meira en ella. Málið er þekkt sem „Fat Leonard hneykslið“ en þar er vísað til líkamsstærðar Leonard.
Gæslan í tengslum við stofufangelsi Leonard var mjög óvenjuleg. Hann var látinn laus úr fangelsi 2018 til að hann gæti farið í krabbameinsmeðferð. Einkafyrirtæki sá um að gæta hans og greiddi hann sjálfur fyrir gæsluna. Nokkur tilvik höfðu komið upp þar sem enginn öryggisvörður var að gæta hans þegar lögreglan kom í húsið.
Dagana áður en hann stakk af sáu nágrannar sendibíla koma og fara frá húsi hans.
