Í Cassville skólaumdæminu í Missouri í Bandaríkjunum hefur fræðsluráðið ákveðið að heimila að nemendur verði flengdir. Þetta var samþykkt á fundi ráðsins í júní. Flengingar voru leyfðar í skólaumdæminu þar til 2001.

The Guardian skýrir frá þessu og vísar í umfjöllun Springfield News Leader.

Samkvæmt nýju reglunum verður heimilt að rassskella nemendur, með spaða, í skólastofum. Ákvörðunin var tekin á grunni könnunar sem foreldrar svöruðu á síðasta ári. Í ljós kom að þeir vildu að kennarar hefðu fleiri möguleika til að beita agaviðurlögum.

Eru foreldrarnir sagðir hafa viljað að skólarnir hefðu fleiri möguleika en að vísa börnum úr skóla í refsingarskyni.

Flengingar verða aðeins heimilar sem „síðasta úrræði“ ef önnur agaviðurlög bera ekki árangur. Foreldrar þurfa að gefa leyfi til að flengja megi börn þeirra og skrifa undir skjal þess efnis. Ekki liggur fyrir hversu margir foreldrar munu heimila þetta.