Fjölskyldan fór akandi til og frá Svíþjóð. Þegar hún kom aftur heim til Emmen og byrjaði að tæma bílinn fékk hún áfall.
Þegar búið var að taka töskur og pinkla inn var ekki annað eftir en að tæma „tengdamömmuboxið“ á toppi bifreiðarinnar. Þau opnuðu það og lokuðu strax aftur.
Ástæðan var að í boxinu var svört slanga sem sýndi þeim höfuð sitt.
Skýrt er frá þessu á Facebooksíðu dýraeftirlitsins í Zuidoost Drenthe en starfsmenn þess urðu að koma fjölskyldunni til aðstoðar.
Svo vel vildi til að einn starfsmanna dýraeftirlitsins hefur mikla reynslu af slöngum og vissi hvernig átti að nálgast hana og taka á henni.
Þetta reyndist vera svartur höggormur. Hann var ekki sérstaklega sáttur við að vera dreginn út úr hlýjunni í „tengdamömmuboxinu“ og beit því starfsmanninn. Hann var með þykka hanska sem bitið fór ekki í gegnum. Hann náði höggorminum og var hann settur í kassa.
Höggormurinn er nú í vörslu dýraeftirlitsins og verður þar til ákveðið hefur verið hver örlög hans verða.
