Tveir menn, 21 og 33 ára, hafa verið ákærðir fyrir morðið á norðurírsku fréttakonunni Lyra McKee sem var skotin til bana í Derry 2019 þegar hún var að fylgjast með óeirðum þar.

McKee, sem var 29 ára, var einn fremsti ungi blaðamaður Norður-Írlands og hafði vakið mikla athygli fyrir skrif sín.

Lögreglan á Norður-Írlandi segir að mennirnir hafi einnig verið ákærðir fyrir vörslu skotvopna og skotfæra sem hafi verið ætlað til að ógna lífi fólks, til að nota í óeirðum og fyrir vörslu bensínsprengna, notkun þeirra og íkveikju. Sá 33 ára er einnig ákærður fyrir rán.

Þriðji maðurinn, 20 ára, hefur verið ákærður fyrir óeirðir, vörslu bensínsprengna og fyrir notkun þeirra.

Þeir munu mæta fyrir dómara í dag í gegnum fjarfundabúnað.