Fagfólk hefur miklar áhyggjur af ungmennum sem nota nikótínpúða og það ekki eingöngu í munninn. Dæmi eru um að þau troði þeim undir forhúðina, í endaþarminn eða í leggöngin. Varla þarf að fjölyrða um hættuna sem getur stafað af þessu.

Lengi hefur verið þekkt að ungmenni, og fullorðnir, noti nikótínpúða og troði þeim undir vörina en nú virðast margir troða þeim í önnur líkamsop. Þetta kemur fram í umfjöllun Danska ríkisútvarpsins sem ræddi við sérfræðinga í heilbrigðismálum.

„Stundum er þetta partýkúltúr. Unga fólkið er áhættusækið og vill kannski skora hvert annað á hólm. En þetta er líka örugglega vegna þess að sumir vilja leyna því að þeir eru orðnir háðir þessu og vilja ekki að foreldrar þeirra komist að því,“ sagði Rikke Højland, heilbrigðisráðgjafi í Holsterbro. Hún sagðist heyra að unga fólkið sé mjög hugmyndaríkt þegar kemur að notkun nikótínpúðanna og það sé mikið áhyggjuefni.

Með því að setja nikótínpúðana í þessi líkamsop komast þeir í beina snertingu við slímhimnuna og það getur valdið tjóni á henni eins og þeir gera einnig þegar þeir eru settir undir varirnar. Mörg dæmi eru um slæmt tjón á tannholdi vegna nikótínpúðanotkunar.

Dönsk heilbrigðisyfirvöld telja að allt að 10% ungmenna noti nikótínpúða eða álíka vörur.