Niðurstöður breskrar rannsóknar sýna að miklu meiri líkur eru á að fólk þurfi að leggjast inn á sjúkrahús ef það smitast af Deltaafbrigði kórónuveirunnar en af öðrum afbrigðum hennar. Deltaafbrigðið er því ekki aðeins mun meira smitandi en önnur afbrigði, það eykur líkurnar á sjúkrahúsinnlögnum einnig mikið.

Niðurstaða rannsóknarinnar hefur verið birt í vísindaritinu The Lancet. Rannsóknin var gerð í Bretlandi og niðurstaða hennar er að hættan á að fólk þurfi að leggjast inn á sjúkrahús vegna COVID-19 sé tvöfalt meiri ef fólk er smitað af Deltaafbrigðinu en það er hið ráðandi afbrigði veirunnar víða um heim þessar vikurnar. En góðu fréttirnar eru þær að þeir sem eru bólusettir hafa þar með góða vörn gegn alvarlegum veikindum.

Rannsóknin var meðal annars gerð af breskum heilbrigðisyfirvöldum, Public Health England. 43.338 kórónuveirutilfelli, á tímabilinu mars til maí á þessu ári, voru rannsökuð og segja rannsakendur að þetta sé stærsta rannsóknin til þessa þar sem tvö afbrigði veirunnar hafa verið borin saman.

74% hinna smituðu höfðu ekki verið bólusett, 24% höfðu fengið einn skammt af bóluefni en aðeins 1,8% höfðu fengið tvo skammta.

Tæplega 1.000 manns fengu svo alvarleg sjúkdómseinkenni að þeir þurftu að leggjast inn á sjúkrahús. Þegar búið var að taka tillit til aldurs, kynþáttar og bólusetninga var niðurstaðan sú að líkurnar á að fólk þyrfti á sjúkrahúsinnlögn að halda voru tvöfalt meiri ef það var smitað af Deltaafbrigðinu en til samanburðar var Alphaafbrigðið.

„Rannsóknin staðfestir að fólk sem smitast af Deltaafbrigðinu er miklu líklegra til að þurfa að að leggjast inn á sjúkrahús en þeir sem smitast af Alphaafbrigðinu,“ hefur The Guardian eftir Gavin Dabrera, einum aðalhöfundi rannsóknarinnar.

„Við vitum nú þegar að bóluefni veita frábæra vörn gegn Deltaafbrigðinu og þar sem þetta afbrigði er nú um 98% allra COVID-19 tilfella í Bretlandi skiptir gríðarlegu máli að þeir sem hafa ekki enn fengið tvo skammta af bóluefni fái þá eins fljótt og hægt er,“ sagði hann einnig.