Það er James Howell, 35 ára tölvusérfræðingur, sem situr nú og svitnar yfir mistökum sínum en þau gætu kostað hann sem svarar til um 50 milljarða íslenskra króna. Það er að segja hann þarf ekki að punga þessari upphæð út en hann fær hana ekki í hendur.
Upphæðin er í rafmyntinni Bitcoin og er á hörðum diski sem Howell henti þegar hann tók til á skrifstofunni sinni fyrir átta árum. Eftir að hann uppgötvaði þetta hefur hann íhugað hvernig hann finnur harða diskinn aftur og nú hefur hann hafið skipulagða leit með aðstoð tölvusérfræðinga og röntgenbúnaðar. News.com.au skýrir frá þessu.
Hann vill leita að disknum á ruslahaug við Newport í Wales þar sem hann á heima og sorp frá bæjarbúum er losað. Hann hefur boðið bæjarstjórninni sem svarar til um 10 milljarða íslenskra króna ef hann fær leyfi til leitar og finnur harða diskinn. En bæjarstjórinn vill ekki einu sinni hlusta á tillögu hans.
Því treystir Howell nú á þá sérfræðinga sem hann hefur fengið til liðs við sig. Leitin verður ekki ódýr en hann hefur fengið sjóð einn til að standa straum af kostnaðinum, að sjálfsögðu gegn því að sjóðurinn fá hluta af ávinningnum ef diskurinn kemur í leitirnar.
