Bóluefni gegn kórónuveirunni frá franska lyfjafyrirtækinuj Sanofi og breska lyfjafyrirtækinu GlaxoSmithKline (GSK) þykir lofa góðu en tilraunir standa nú yfir með það. Eru það annars stigs tilraunir en þriðja stigs tilraunir hefjast á næstu vikum.
Í tilkynningu frá Sanofi segir að annars stigs tilraunirnar sýni að 95 til 100% þátttakenda hafi þróað mótefni gegn kórónuveirunni eftir að hafa fengið tvo skammta af bóluefninu. Þetta á við um alla aldurshópa frá 18 til 95 ára.
Segir fyrirtækið að annars stigs tilraunirnar sýni að bóluefnið muni líklega geta leikið hlutverk í baráttunni við kórónuveiruna.
„Við vitum að það er þörf fyrir mörg bóluefni. Það koma stöðugt ný afbrigði og það er þörf fyrir áhrifarík bóluefni sem geta verndað fólk og hægt er að geyma í venjulegum frystum,“ er haft eftir Thomas Triomphe, hjá Sanofi.
Þriðja stigs tilraunir hefjast á næstu vikum og reiknað er með að bóluefnið fái markaðsleyfi á síðasta ársfjórðungi ársins.
Bóluefnið er byggt á prótíni en Sanofi vinnur einnig að þróun bóluefnis, byggðu á mRAN, í samstarfi við Translate Bio. Það er sama tækni og bóluefnin frá Pfizer/BioNTech og Moderna byggjast á.
Sanofi tilkynnti nýlega að fyrirtækið muni framleiða 200 milljónir skammta af bóluefni Moderna fyrir Bandaríkjamarkað frá og með september. Áður hafði fyrirtækið tilkynnt að það muni aðstoða við framleiðslu 125 milljón skammta af bóluefni Pfizer/BioNTech fyrir ESB.
