Starfsfólk og viðskiptavinir matvöruverslunar í Dunedin á Nýja-Sjálandi hafa verið hylltir fyrir fram göngu þeirra í gær þegar vopnaður maður réðst á fólk í versluninni og stakk. Hann náði að stinga fjóra áður en lögreglan kom á vettvang og handtók hann. Þrír eru alvarlega særðir en sá fjórði slapp betur frá árásinni.

Paul Basham, yfirlögregluþjónn, sagðist í samtali við nýsjálenska fjölmiðla vera búinn að horfa á upptökur úr eftirlitsmyndavélum og á þeim sjáist að starfsfólk og viðskiptavinir hafi unnið hetjudáð við að halda aftur af árásarmanninum þar til lögreglan kom á vettvang.

Hann sagði að þeir sem gripu til aðgerða gegn manninum hafi sýnt af sér mikla óeigingirni og hugrekki til að koma í veg fyrir að maðurinn gæti ráðist á fleiri.

Hinn handtekni er 42 ára og hefur hann verið úrskurðaður í gæsluvarðhald. Basham sagði að miðað við fyrirliggjandi gögn virðist sem um tilviljanakennda árás hafi verið að ræða, ekkert hafi komið fram sem bendi til annars.