Það færist sífellt í vöxt í Afríku að malaría sé ónæm fyrir lyfjum. Um er að ræða stökkbreytt afbrigði af malaríusníkjudýrinu sem eru að ná sífellt betri fótfestu í álfunni en þessi stökkbreyttu afbrigði eru ónæm fyrir lyfjum.

Þetta eru niðurstöður nýrrar rannsóknar sem var birt í vísindaritinu The Lancet í gær.

Sérfræðingar hafa lengi haft áhyggjur af afleiðingum þess fyrir álfuna ef afbrigði, ónæm fyrir lyfjum, myndu þróast. Áhyggjur þeirra stafa ekki síst af þeirri staðreynd að 90% þeirra 400.000 sem létust úr malaríu 2019 voru Afríkubúar.

Malaría er bráður smitsjúkdómur sem sníkjudýrið plasmodium falciparum veldur en það berst í fólk með mýflugum.

Niðurstöður rannsóknarinnar sýna að veikindi barna vörðu lengur ef þau voru smituð af stökkbreyttum afbrigðum sníkjudýrsins. Rúmlega 200 börn á aldrinum sex mánaða til fimm ára tóku þátt í rannsókninni. Þau fengu öll hefðbundna þriggja daga meðferð við smiti og síðan var fylgst með þeim í 28 daga. Þá voru 15% þeirra enn með sníkjudýr í líkamanum en það er merki um ónæmi.