Lögreglan í Knoxville í Tennessee í Bandaríkjunum skaut síðdegis í gær, að staðartíma, nemanda við Austin-East Magnet High School til bana.  Hann hafði læst sig inni á salerni og neitaði að koma út. Þegar lögreglan opnaði dyrnar skaut hann á lögreglumenn sem svöruðu skothríðinni og urðu honum að bana.

Í færslu á Twitter sagði lögreglan að nokkrir hefðu verið skotnir í Austin-East Magnet High School og bað fólk að halda sig fjarri vettvangi, hér væri um skotárás að ræða í skólanum. Síðar sagði lögreglan að einn væri látinn og að annar hefði verið handtekinn. Þetta skildi fólk sem svo að skotmaðurinn væri í haldi og að hann hefði orðið einum að bana. En málin voru ekki þannig vaxin.

Fylkislögreglan, TBI, tók fljótlega við rannsókn málsins og kom með aðra útgáfu af atburðarásinni. Hún sagði að sá látni, sem var á unglingsaldri og nemandi í skólanum, hafi skotið á lögreglumenn þegar þeir opnuðu dyrnar inn á salernið. Einn lögreglumaður hafi orðið fyrir skoti, í fótlegg. Annar lögreglumaður svaraði skothríðinni og varð piltinum að bana. Engir aðrir urðu fyrir skotum.

Á fréttamannafundi sagði David Raucsh, yfirmaður TBI, að það verði að gæta að orðalagi í tilkynningum um atburði sem þessa. Hér hafi ekki verið um árás á nemendur að ræða.

Það sem af er ári hafa fimm nemendur verið skotnir til bana í Austin-East Magnet High School í fimm ótengdum málum að sögn CBS.