BBC skýrir frá þessu og hefur eftir Rochelle Walensky, forstjóra CDC. Hún sagðist hafa áhyggjur af nýjustu tölum um smit í landinu en í síðustu viku voru staðfest smit um 70.000 á sólarhring. Tæplega 2.000 létust að meðaltali á hverjum sólarhring af völdum COVID-19. „Með þessum fjölda nýrra smita, sem geta dreift sér, getum við hratt glatað þeim árangri sem við höfum náð. Þessi afbrigði eru raunveruleg ógn við fólk og árangur okkar,“ sagði hún.
Mörg afbrigði veirunnar eru á sveimi en sérfræðingar hafa sérstaklega miklar áhyggjur af nokkrum. Það eru afbrigði sem fyrst uppgötvuðust í Bretland, Suður-Afríku og Brasilíu. Öll eru þau talin vera meira smitandi en önnur afbrigði.
CDC hefur spáð því að B117 afbrigðið, sem fannst fyrst í Bretlandi, verði ráðandi í Bandaríkjunum nú í febrúar. Af þessum sökum hefur Walensky áhyggjur af að sum ríki eru farin að draga úr sóttvarnaaðgerðum. „Við erum með getuna til að stöðva hugsanlega fjórðu bylgju faraldursins í landinu. Við verðum að trúa á það,“ sagði hún að sögn BBC.
Frá upphafi faraldursins hafa rúmlega 28 milljónir Bandaríkjamanna greinst með veiruna og rúmlega hálf milljón hefur látist.
Bólusetningar gegn veirunni hófust í desember og nú hafa rúmlega 50 milljónir Bandaríkjamanna fengið fyrri skammt bóluefnis og af þeim hefur helmingurinn fengið síðari skammtinn og hefur því lokið bólusetningu.
76 milljónum skammta hefur verið dreift um landið svo enn er mikið magn ónotaðra skammta víða um landið.
