Lággjaldaflugfélagið Ryanair býst við erfiðu rekstrarári og segist hugsanlega tapa 1 milljarði evra á árinu. Talsmenn fyrirtækisins segja að ESB verði að auka hraðann í bólusetningum gegn kórónuveirunni en veiran hefur farið illa með Ryanair eins og flest önnur flugfélög. Farþegafjöldinn hjá félaginu dróst saman um 78% á síðasta ársfjórðungi 2020 miðað við sama tíma 2019.

Félagið segir að það hafi aldrei glímt við eins erfitt rekstrarumhverfi og nú síðan það var stofnað fyrir 35 árum.

Tap þess nam 306 milljónum evra á fjórða ársfjórðungi 2020 og má rekja það til ferðatakmarkana og annarra sóttvarnaaðgerða í Evrópu. Flugfélagið var síðast rekið með tapi 2009.

Í tilkynningu frá félaginu segir að ESB verði að setja aukinn kraft í bólusetningaáætlun sína til að halda í við Breta, núverandi hægagangur ógni bókunum hjá félaginu.

Michael O’Leary, forstjóri félagsins, segist treysta á að fólk muni ferðast næsta sumar og segist reikna með að Bretar muni fara til sólarstranda. Í viðtali við BBC Radio 4 sagði hann að þar sem 93% af öllum dauðsföllum af völdum kórónuveirunnar eigi sér stað hjá fólki eldra en 65 ára verði engin þörf á ferðatakmörkunum þegar búið verður að bólusetja fólk í þessum aldurshópi í Bretlandi og á meginlandinu.