Að kvöldi 27. janúar 1976 ók Kyle Clinkscales, 22 ára, heiman frá sér í LaGrange í Georgíu en för hans var heitið í háskóla í Alabama sem hann stundaði nám í. LaGrange er um 25 kílómetra frá ríkjamörkunum við Alabama. En Kyle skilaði sér aldrei á áfangastað og ekkert spurðist til hans þar til á þriðjudaginn, þá fannst hann.

James Woodruff, lögreglustjóri í Troup County í Georgíu, sagði á fréttamannafundi í gær að bíll Kyle og það sem talið er að séu líkamsleifar hans hafi fundist á þriðjudaginn í vatni við County Road 83, rúmlega kílómetra frá County Road 388. Það var vegfarandi sem tilkynnti um bílinn í vatninu.

Þegar lögreglan kom á vettvang var stóð bíllinn að hluta upp úr vatninu og sást frá veginum.

CNN segir að Sid Lockhart, lögreglustjóri í Chambers County, hafi sagt að bíllinn hafi fundist um 5 kílómetrum frá þeirri leið sem hefði undir eðlilegum kringumstæðum verið eðlileg akstursleið Kyle til skólans. Hann sagðist ekki vita hvort leitað hafi verið á þessu svæði á sínum tíma þegar leitað var að Kyle.

Þegar bíllinn hafði verið hífður upp úr vatninu kom í ljós að þetta var hvítur Pinto með skráningarnúmerum frá Troup County og reyndist þetta vera bíll Kyle. Þak bílsins var gjörónýtt vegna ryðs. Í bílnum fundust bein, sem talið er að séu mannabein, og veski með skilríkjum Kyle og greiðslukortum.

Móðir Kyle lést fyrr á árinu en hún hafði allan tímann lifað í von um að hann sneri heim á lífi. Faðir hans lést 2007. Kyle var einkabarn.