Vísindamenn við University of Glasgow segja að vísbendingar séu um að agnir frá sólinni hafi myndað vatn á yfirborði rykagna á loftsteinum sem lentu á jörðinni. Vísindamenn hafa lengi rætt um uppruna vatns hér á jörðinni, hvort það hafi verið til staðar þegar jörðin myndaðist eða hvort það hafi borist annars staðar frá.

En niðurstöður nýrrar rannsóknar benda til þess að vatn eigi rætur að rekja til sólarinnar. Samkvæmt því sem stjörnufræðingar segja gæti geislun frá sólinni hafa myndað vatn á yfirborði rykagna sem bárust síðan til jarðarinnar með loftsteinum fyrir milljörðum ára.

Sky News skýrir frá þessu. Vatn þekur rúmlega 70% af yfirborði jarðarinnar en vísindamenn hafa velt vöngum yfir uppruna þess áratugum saman.

Niðurstöður nýju rannsóknarinnar hafa verið birtar í tímaritinu Nature Astronomy. Það voru vísindamenn við University of Glasgow sem stýrðu rannsókninni.

Luke Daly, aðalhöfundur rannsóknarinnar, sagði að sólarvindar séu straumar af vetnis- og helíumjónum, að mestu, sem streymi stanslaust frá sólinni út í geiminn. Þegar vetnisjónin lendi á loftlausu yfirborði eins og loftsteini eða rykögn borist þær nokkra tugi nanómetra niður í yfirborðið þar sem þær geta haft áhrif á efnasamsetningu steinsins. Með tímanum geti vetnisjónin leyst nægilega mikið af súrefnisatómum úr efnum í steininum til að mynda H2O, vatn, sem leynist í málmum í steininum.