Þetta eru niðurstöður nýrrar stórrar breskrar rannsóknar. Allt frá því að heimsfaraldurinn skall á hefur COVID-19 Symptom Study safnað upplýsingum um Breta og faraldurinn.
Eftir að búið var að bólusetja stóran hluta þjóðarinnar sáu vísindamennirnir að breytingar urðu á sjúkdómseinkennum smitaðra, það er að segja hjá þeim sem eru bólusettir gegn kórónuveirunni. Mesti munurinn á einkennum bólusettra og óbólusettra er hnerri. „Gögnin okkar bendi til þess að það að fólk hnerri meira en venjulega geti verið einkenni COVID-19 en bara hjá bólusettu fólki,“ segja vísindamennirnir sem gerðu rannsóknina.
Talið er að bólusetning veiti 60-80% vörn gegn smiti, það eru því mun minni líkur á að bólusett fólk smitist af kórónuveirunni.
En ef bólusett fólk smitast og fær sjúkdómseinkenni þá minna þau á kvef samkvæmt niðurstöðum bresku rannsóknarinnar. Helstu einkennin eru nefrennsli, höfuðverkur, særindi í hálsi og hósti. Bólusett fólk missir líka lyktar- og bragðskyn en mun sjaldnar en óbólusettir.
Breska rannsóknin byggir á gögnum sem milljónir Breta sendu inn í gegnum sérstakt app. Þar skráði fólk öll hugsanleg sjúkdómseinkenni og hvort það hefði greinst með veiruna eða ekki. Flestir þeirra sem skráðu sjúkdómseinkenni og jákvæða niðurstöðu sýnatöku þurftu ekki að leggjast inn á sjúkrahús. Þeir urðu ekki svo veikir að þeir þyrftu þess.
