En nú hefur málið tekið nýja stefnu sem gæti reynst Andrew skeinuhætt. Margir hafa velt því fyrir sér hvað stendur í samningi Epstein og Giuffre en hann er leynilegur. En kannski fáum við fljótlega upplýsingar um það því nú hefur bandarískur dómari ákveðið að samningurinn verði gerður opinber en þeirri ákvörðun má líkja við að sprengja hafi verið sett undir prinsinn. Sérfræðingar telja nær útilokað annað en að innihald samningsins sé eldfimt og að í honum séu upplýsingar sem geti skaðað prinsinn, óbeint eða beint, og tengi hann við barnaníð og kynferðisofbeldi. „Hvað sem kemur fram í þessum samningi þá er næstum óhjákvæmilegt að það geti verið dínamít,“ sagði Jakob Illeborg, fréttamaður B.T. um samninginn.
Loretta Preska, dómari, tilkynnti á þriðjudaginn að samningurinn verði gerður opinber. Independent skýrir frá þessu.
Nú standa yfir réttarhöld í máli ákæruvaldsins gegn Ghislaine Maxwell sem er ákærð fyrir að hafa verið samverkakona Epstein og að hafa aðstoðað hann við að komast í samband við ungar stúlkur sem hann, og stundum hún, beittu síðan kynferðislegu ofbeldi.
Fjórar konur, sem bera Maxwell þessum sökum, hafa komið fyrir dóm auk ráðsmanns Epsteins og fleiri vitna. Fram að þessu hafa vitnin nefnt nöfn Andrew prins, Donald Trump, Bill Clinton og fleiri sem eru sagðir hafa þekkt Epstein og umgengist hann.
Prinsinn hefur enn sem komið er ekki þurft að bera vitni í málinu en hann hefur dregist inn í það, meðal annars vegna ásakana Giuffre um að hún hafi verið kynlífsþræll Epstein og hafi verið neydd til að stunda kynlíf með prinsinum. Hún hefur einnig höfðað einkamál á hendur prinsinum en lögmenn hans telja að ekki sé hægt að sækja hann til saka vegna fyrrgreinds samnings Epstein og Giuffre frá 2008.
Samningurinn var gerður þeirra á milli í tengslum við ásakanir á hendur Epstein fyrir kynferðisbrot gegn barnungum stúlkum. Opinbert mál var einnig höfðað í tengslum við málið og var Epstein þá dæmdur í 13 mánaða fangelsi en það þótti mörgum ótrúlega vægur dómur miðað við að um kynferðislegt ofbeldi gagnvart börnum var að ræða.
Samkvæmt ákvörðun Preska verður þessi leynilegi samningur nú gerður opinber, í síðasta lagi 22. desember nema fulltrúar Epstein mótmæli því. Hann tekur ekki sjálfur til varna því hann fyrirfór sér í fangelsi í New York í ágúst 2019 en þar sat hann í gæsluvarðhaldi.
Öruggt má telja að margir bíði spenntir eftir að samningurinn verði gerður opinber og í Buckinghamhöll eru sumir væntanlega með miklar áhyggjur. Ekki er vitað hvað stendur í samningnum eða hversu nákvæmar lýsingar koma fram í honum eða hvort nöfn séu nefnd þar eða ákveðnir atburðir.
Eitt af því athyglisverðasta í tengslum við samninginn er af hverju prinsinn er nefndur í honum þegar um samning á milli tveggja annarra aðila, sem eru ótengdir prinsinum, er að ræða.
