Margir þeirra sem hafa smitast af kórónuveirunni hafa upplifað að hafa algjörlega misst lyktar- og bragðskynið. Þetta hefur vakið mikla undrun vísindamanna en nú telja sænskir vísindamenn sig vera komna nálægt því að leysa þessa ráðgátu.

Aftonbladet skýrir frá þessu. Segir blaðið að þetta snúist um að vísindamenn hafi fundið kórónuveiru í svokölluðum stuðningsfrumum við lyktarnemana í nefinu. Veiran truflar starfsemi stuðningsfrumanna og svæðið í kringum þær, við lyktarnemana, verður óvirkt er haft eftir Johan Lundström, dósent í klínískri taugasjúkdómafræði við Karólínsku stofnunina. Hann sagði að veiran hafi líklega einnig áhrif á það svæði heilans sem tekur við lykt frá nefinu. Vísindamennirnir fundu ummerki um kórónuveiru á þessu svæði og telja því að það geti skýrt af hverju lyktarskynið fer úr skorðum við smit. „Veiran kemst þangað en ekki lengra,“ sagði hann um veru hennar í heilanum.

Þessi uppgötvun gæti verið góð frétt fyrir þá sem hafa orðið illa fyrir barðinu á þessum einkennum því þetta getur auðveldað þjálfun lyktarskynsins á nýjan leik.