Það er ólíklegt að núverandi bóluefni gegn kórónuveirunni muni hafa sömu virkni gagnvart Ómíkronafbrigðinu og öðrum afbrigðum kórónuveirunnar. Þetta sagði Stéphane Bancel, forstjóri Moderna, í samtali við Financial Times.

„Ég get ekki ímyndað mér að hún (virknin, innsk. blaðamanns) sé jafn mikil og gagnvart Deltaafbrigðinu,“ sagði hann.

„Ég held að virknin verði mun minni. Hversu miklu minni, veit ég ekki því við verðum að bíða eftir gögnum. En allir vísindamenn, sem ég hef rætt við, eru á því að „þetta verði ekki gott“,“ sagði hann.

Ef Ómíkronafbrigðið, sem uppgötvaðist í Suður-Afríku í síðustu viku, reynist hafa meira þol gagnvart bóluefnum getur það haft fleiri smit í för með sér sem og sjúkrahúsinnlagnir. Það þýðir að þá lengist enn í heimsfaraldrinum sem hefur bráðum geisað í tvö ár.

Áður en Deltaafbrigðið varð hið ráðandi afbrigði sýndu rannsóknir að bóluefni Moderna veitti 86% vörn í upphafi árs. Þegar Deltaafbrigðið sótti í sig veðrið var vörnin komin niður í 76% samkvæmt niðurstöðum rannsóknar sem var birt í ágúst.

Ómíkron er frábrugðið öðrum afbrigðum vegna mikils fjölda stökkbreytinga sem stýra hegðun þess. Það getur valdið því að afbrigðið sé meira smitandi en önnur þekkt afbrigði veirunnar. Þessar stökkbreytingar þýða, að mati Bancel, að laga þurfi núverandi bóluefni að þeim.

Hann hafði áður sagt í samtali við CNBC að margir mánuðir geti liðið þar Moderna verði tilbúið með bóluefni sem virkar gegn Ómíkron.

Alþjóðaheilbrigðismálastofnunin WHO segir að afbrigðið veki áhyggjur en rannsaka þurfi hvort það sé meira smitandi en önnur afbrigði.