Japan Times er meðal þeirra fjölmiðla sem skýra frá þessu. Fram kemur að vísindamenn hafi sett fram þá kenningu að Deltaafbrigðið sé eiginlega orðið þreytt og hafi komið sjálfu sér í þá stöðu að það „útrými sér á náttúrulegan hátt“.
Þeir telja að þar sem afbrigðið er búið að stökkbreyta sér svo oft þá geti það ekki lengur afritað sig sjálft.
Japan hefur verið í heljargreipum faraldursins en þegar verst lét þá greindust um 26.000 smit á dag en um 125 milljónir búa í landinu. En í nóvember breyttist staðan skyndilega til hins betra. Síðustu vikur hafa tæplega 200 smit greinst á dag og nýlega kom einn dagur þar sem engin lést af völdum COVID-19 en það hafði ekki gerst í 15 mánuði. Í gær greindust aðeins 44 með veiruna í öllu landinu. Í Tókýó, þar sem um 40 milljónir búa, greindust aðeins 6.
Ituro Inoue, sérfræðingur í erfðarannsóknum, sagði í samtali við Japan Times að Deltaafbrigðið hafi safnað upp of mörgum stökkbreytingum á prótíni, sem heitir nsp14, en það sér um að lagfæra veiruna. Þetta veldur að mati Inoue því að veiran hefur átt erfitt með að lagfæra galla tímanlega og því hafi þetta endað með „sjálfseyðingu“. „Eftir því sem stökkbreytingarnar hrúguðust upp teljum við að á endanum hafi veiran orðið gölluð og ekki fær um að afrit sig sjálfa,“ sagði hann.
„Þegar við lítum til þess að smitum hefur ekki fjölgað teljum við að afbrigðið hafi á einhverjum tímapunkti tekið stefnuna á náttúrulega útrýmingu sína,“ sagði hann.
Aðrir hafa bent á að bólusetningar og notkun andlitsgríma hafi orðið til þess að draga úr smitum en Ituro Inoue vísar því á bug.
