Bresk kona á áttræðisaldri var nýlega að taka til heima hjá sér og fann þá meðal annars demant og fleiri muni sem hún hafði keypt á flóamarkaði fyrir mörgum árum. Þar sem hún átti leið til North Shields, North Tyneside, ákvað hún að fara með demantinn og fleiri skartgripi til uppboðshúss þar til að kanna hvort einhver verðmæti væru í skartgripunum.

BBC hefur eftir Mark Lane, hjá Featonby‘s Auctioneers, að honum hafi brugðið mjög þegar endanlegt verðmat lá fyrir. „Konan kom inn með skartgripi í poka og ætlaði bara að kanna með verðmæti þeirra þar sem hún átti leið hjá. Demanturinn hafði verið geymdur í kassa ásamt giftingarhring hennar og ódýrum skartgripum. Við sendum hann til samstarfsaðila okkar í Antwerpen sem staðfesti að hann er 34 karöt,“ sagði Lane.

Hann sagði að konan haldi að hún hafi keypt demantinn á flóamarkaði en muni það ekki alveg fyrir víst. Henni hafi aldrei dottið í hug að um raunverulegan demant væri að ræða. „Hún sagðist hafa verið að taka til og að hann hefði næstum því lent í ruslinu en nágranni hennar hafi bent henni á að láta verðmeta hann,“ sagði hann.

Demanturinn verður boðinn upp í lok nóvember en reiknað er með að tvær milljónir punda, sem svara til um 350 milljóna íslenskra króna, fáist fyrir hann.