Nú eru tæp tvö ár síðan heimsfaraldur kórónuveirunnar skall á heimsbyggðinni en samt sem áður er enn ekki alveg vitað hvenær faraldurinn braust í raun út og byrjaði að dreifa sér um heiminn. Niðurstöður nýrrar rannsóknar bandarískra vísindamanna sýna að það gerðist líklegast töluvert fyrr en talið hefur verið fram að þessu. Einnig sýna niðurstöðurnar að fjöldi smita hafi komið upp sem uppgötvuðust ekki.

Með því að nota stærðfræðilíkön hafa vísindamenn komist að þeirri niðurstöðu að veiran hafi verið komin til margra Evrópuríkja og Bandaríkjanna í janúar 2020 og að þar til í mars 2020 hafi aðeins 1 til 3 prósent smittilfella uppgötvast. Rannsóknin hefur verið birt í vísindaritinu Nature.

Í henni skoðuðu vísindamennirnir flugumferð á milli Bandaríkjanna og Evrópu til að fá yfirsýn yfir hvernig veiran barst frá Wuhan í Kína til annarra ríkja.

Ítalskir vísindamenn telja að fyrstu smitin þar í landi hafi komið upp 6. janúar 2020 en fyrsta opinbera tilfellið var skráð 21. febrúar.

Niðurstöður rannsóknarinnar sýna einnig að mörg smit uppgötvuðust ekki. Í byrjun mars greindust aðeins 9 af hverjum 1.000 smitum í Bandaríkjunum. Í Evrópu var hlutfallið 35 af hverjum 1.000 smitum.

Í rannsókninni var einnig skoðað hvernig flugsamgöngum var háttað á milli Ítalíu og Kína á þessum tíma og kom í ljós að þær voru miklar enda samstarf ríkjanna mikið á mörgum sviðum. Það kemur því kannski ekki á óvart, svona eftir á að hyggja, að Ítalía hafi orðið illa úti í upphafi faraldursins.