Bandaríski leikarinn Alec Baldwin varð konu að bana við upptöku á nýrri kvikmynd í gær. Einn til viðbótar særðist. Þetta gerðist við upptökur á kvikmyndinni Rust í Nýju Mexíkó.

Þetta gerðist þegar Baldwin skaut úr byssu, sem var hluti af leikmunum, við upptökur. Lögreglan í Santa Fe hefur staðfest þetta.

Talsmaður Baldwin, sem framleiðir og leikur í myndinni, sagði að um slys hafi verið að ræða þegar Baldwin hleypti skoti úr byssu sem var notuð sem leikmunur.

Konan sem lést hét Halyna Hutchins og var 42 ára upptökustjóri. Hún var flutt með þyrlu á háskólasjúkrahúsið í Nýju Mexíkó en var úrskurðuð látin eftir komuna þangað. Joel Souza, leikstjóri myndarinnar, særðist og er nú á sjúkrahúsi.

Sky News hefur eftir Juan Rios, talsmanni lögreglunnar, að rannsókn standi yfir. Engar kærur hafi verið lagðar fram enn sem komið er og verið sé að yfirheyra vitni.