Á sunnudaginn voru tvær konur, 23 og 26 ára, í göngutúr í Randers í Danmörku. Þá sáu þær að maður virtist vera að reyna að brjótast inn í hús. Konurnar reyndu að stöðva manninn en hann var að reyna að brjótast inn hjá konu, sem hann þekkir, til að stela farsíma hennar. Maðurinn brást illa við þessum afskiptum þeirra og elti þær.

Þegar maðurinn, sem er þrítugur, náði konunum lamdi hann þær. „Þetta hefur verið hræðileg upplifun fyrir þessar tvær konur. Þær reyndu bara að koma til aðstoðar og svo er ráðist á þær,“ hefur BT eftir talsmanni lögreglunnar.

Maðurinn lamdi aðra konuna í höfuðið með krepptum hnefa og síðan lamdi hann höfði hennar niður í bíl. Hún missti meðvitund í stutta stund. Hann sparkaði síðan margoft í höfuð og líkama hinnar konunnar.

Maðurinn var úrskurðaður í fjögurra vikna gæsluvarðhald í gær. Hann verður í einangrun á lokaðri geðdeild. Hann neitar sök.