Á öðrum tímanum í nótt var lögreglunni tilkynnt um mann sem gengi berserksgang í Kumla í Svíþjóð og væri að eyðileggja bíla í miðbænum. Maðurinn var vopnaður hömrum og sleggju. Þegar lögreglumenn komu á vettvang var maðurinn mjög ógnandi. Þeir hrópuðu á hann en hann brást við með að ráðast á þá.

Aftonbladet hefur eftir talsmanni lögreglunnar að á endanum hafi lögreglumenn ekki séð sér neina aðra leið færa en að skjóta á manninn. Þeir skutu hann í annan fótinn og blæddi mikið úr sárinu að sögn Aftonbladet.

Maðurinn var fluttur á sjúkrahús þar sem hann gekkst undir aðgerð í nótt.

Hann er sagður hafa eyðilagt að minnsta kosti þrjá bíla.