Biden hefur sætt vaxandi gagnrýni fyrir að hafa kallað herliðið heim og þá sérstaklega eftir að Talibanar náðu höfuðborginni Kabúl á sitt vald á sunnudaginn. „Ég stend algjörlega við ákvörðun mína,“ sagði Biden.
Ræðu Biden hafði verið beðið af töluverðri eftirvæntingu í ljósi þeirrar ringulreiðar sem ríkir í Kabúl en þar fer spenna sífellt vaxandi. Sérstaklega á flugvellinum sem bandarískir hermenn eru með á valdi sínu. Í gær ruddust mörg þúsund manns inn á flugvöllinn í þeirri von að geta komist úr landi. Bandarískir hermenn reyndu að halda aftur af mannfjöldanum en verkefni þeirra er að tryggja að hægt sé að flytja Bandaríkjamenn, Afgana ,sem störfuðu fyrir Bandaríkjaher og bandamenn þeirra, og vestræna ríkisborgara úr landi.
Biden sagði að áætlun liggi fyrir um hvernig eigi að koma Bandaríkjamönnum úr landi en viðurkenndi að stjórn hans hefði ekki séð fyrir hversu fljótt Talibanar myndu ná Kabúl á sitt vald. „En það hefur aldrei verið ætlunin að byggja landið upp. Við komum þangað til að gera út af við al-Kaída og það gerðum við,“ sagði hann.
Biden sagðist ekki vilja vera með bandaríska hermenn í Afganistan einum degi lengur en nauðsyn krefur. „Við getum ekki látið hermenn okkar deyja í stríði sem afganskar hersveitir vilja ekki einu sinni berjast í,“ sagði hann og vísaði þar til þess að 300.000 manna her landsins hrundi saman á nokkrum dögum en hann hafði verið þjálfaður af bandarískum hermönnum árum saman.
