Fyrirtækið Bluejay Mining hefur fengið 15 milljónir dollara frá nokkrum af ríkustu mönnum heims til að fjármagna leit að sjaldgæfum málmum á Grænlandi. Þetta eru málmar sem er hægt að nota í rafbíla. Meðal fjárfestanna eru Jeff Bezos, stofnandi netverslunarinnar Amazon, og Bill Gates, stofnandi Microsoft.

Samkvæmt frétt Jótlandspóstsins þá verður fjármagnið notað til að hrinda leitarverkefninu Disko-Nuussuaq í gang á vesturströnd Grænlands. Peningarnir koma frá KoBold Metals en þar eru Jeff Bezos og Bill Gates meðal eigenda.

KoBold Metals hefur tryggt sér yfirráðarétt yfir 51% af verkefninu með því að leggja fjármagnið til en vonast er til að platína, kóbalt, nikkel og kopar finnist en þetta eru málmar sem eru nauðsynlegir við framleiðslu rafbíla.

Fulltrúar Bluejay segja að svæðið, þar sem leitað verður, líkist Norilsksvæðinu í Rússlandi jarðfræðilega en þar er nikkel og palladín unnið.