Þetta kemur fram í lögsókn á hendur fyrirtækinu sem Department of Fair Employment and Housing í Kaliforníu hefur lagt fram. Bloomberg Law skýrir frá þessu.
„Frat“ eða „Fraternity“ er orð sem er notað yfir félagsskap í bandarískum háskólum en aðeins karlar fá aðgang að þeim. Þessir félagsskapar hafa margoft verið gagnrýndir fyrir brengluð viðhorf til kvenna og áfengis.
Um 20% starfsfólks hjá Activision Blizzard Inc. eru konur og rannsókn hefur leitt í ljós að margar þeirra hafa orðið fyrir kynferðislegri áreitni og mismunun vegna kynferðis síns án þess að stjórnendur hafi brugðist við.
Í lögsókninni er því meðal annars lýst að ölvaðir karlkyns starfsmenn hafi skriðið um skrifstofurýmið og sýnt af sér „óviðeigandi framkomu“. Stjórnendur fyrirtækisins eru einnig sakaðir um að gera engar athugasemdir við að karlkyns starfsmenn spili tölvuleiki allan daginn í vinnunni og að verkefnum þeirra sé þá ýtt yfir á konurnar og grín gert að nauðgunum.
Konunum er einnig mismunað hvað varðar laun, verkefni og möguleika á stöðuhækkunum. Margar konur segja að það hafi haft neikvæð áhrif á framamöguleika þeirra innan fyrirtækisins að verða barnshafandi.
Einnig kemur fram í lögsókninni að ein kona hafi tekið líf sitt þegar hún var í vinnuferð með karlkyns starfsmanni. Hún hafði orðið fyrir mikilli kynferðislegri áreitni áður en hún tók líf sitt, til dæmis hafði nektarmynd af henni verið látin ganga manna á milli í samkvæmi á vegum fyrirtækisins.
