Sóttvarnaaðgerðir og lokun landamæra vegna heimsfaraldurs kórónuveirunnar hefur haft áhrif á evrópska fíkniefnamarkaðinn. Fíkniefnasmyglarar og fíkniefnasalar hafa þurft að laga sig að breyttum aðstæðum.

Þetta kemur fram í nýrri rannsókn EMCDDA, sem er sú stofnun ESB sem fylgist með þróun mála á fíkniefnamarkaðnum.

Fram kemur að í staðinn fyrir að senda kannabis eða kókaín með smyglurum yfir landamæri sé nú notast meira en áður við gáma og aðrar flutningsleiðir varnings.

Alexis Goosdeele, forstjóri EMCDAA, segir í fréttatilkynningu að fíkniefnamarkaðurinn sé mjög lifandi og góður í að laga sig að breyttum aðstæðum.

Heimsfaraldurinn hefur einnig haft áhrif á fíkniefnaneyslu Evrópubúa. Til dæmis hefur neysla á MDMA, sem er yfirleitt notað í tengslum við skemmtanir, minnkað mikið því víða var lítið um næturlíf og skemmtanahald.

Rannsóknir á skolpi í nokkrum borgum í álfunni sýndu þó að notkun á öðrum fíkniefnum jókst mikið sumarið 2020 en þá var slakað á sóttvarnaaðgerðum.

Það sem veldur einna mestum áhyggjum er að neysla á krakki hefur aukist í nokkrum löndum síðan faraldurinn skall á.