Bandarískum yfirvöldum tókst nýlega að ná aftur 63,7 Bitcoin sem höfðu verið greidd til rússnesku tölvuþrjótanna í DarkSide af olíudreifingarfyrirtækinu Colonial Pipeline. Þrjótarnir brutust inn í tölvukerfi fyrirtækisins nýlega og lömuðu olíudreifingu víða um Bandaríkin og greiddi fyrirtækið þeim lausnargjald.

Sky News segir að fyrirtækið hafi greitt þrjótunum 4,4 milljónir dollara í lausnargjald en nú hefur tekist að ná um 2,3 milljónum dollara aftur.

Haft er eftir Lisa Monaco, saksóknara, að DarkSide og samstarfsaðilar þeirra hafi lengi verið að eltast við bandarísk fyrirtæki og hafi ráðist á fyrirtæki sem eru samfélagslega mikilvæg. Nú hafi leiknum verið snúið við því bandarísk yfirvöld hafi nú gert atlögu að öllu því kerfi sem styður við tölvuárásir og „gíslatökur“ á tölvukerfum, þar á meðal að glæpamenn fái greitt í rafmynt. Hún sagði að áfram verði öllum tiltækum ráðum beitt til að reyna að koma illa niður á tölvuþrjótum.

Hún sagði að um fyrstu aðgerð nýs teymis væri að ræða en það var stofnað til að takast á við mál af þessu tagi. Teyminu tókst að komast yfir aðgangskóða að Bitcoinreikningi þrjótanna og færa Bitcoin af honum.