Yfirvöld í Líbanon og Sádí-Arabíu  deila nú hart eftir að sádí-arabískir tollverðir leituðu í sendingu af granateplum frá Líbanon. Í kjölfarið hafa yfirvöld í Sádí-Arabíu  bannað innflutning á öllum landbúnaðarvörum frá Líbanon og þar á meðal vörum sem fara aðeins í gegnum Sádí-Arabíu  á leið sinni til annarra landa. Með þessu er í raun búið að loka á útflutning Líbana til stærstu markaða sinna.

Um er að ræða skipsfarm af granateplum sem tollverðir tóku til skoðunar. Í honum fundu þeir milljónir af amfetamíntöflum. Þessu brugðust yfirvöld hart við og bönnuðu allan innflutning á vörum frá Líbanon en það kemur sér mjög illa fyrir landið sem er mitt í erfiðri pólitískri krísu sem og efnahagslegri. Útflutningur á ávöxtum og grænmeti er mikilvæg tekjulind fyrir landið en útflutningur þess til Arabaríkjanna nemur 92 milljónum dollara árlega.

Yfirvöld í Sádi-Arabíu hafa látið beiðnir líbanskra stjórnmálamanna, um að innflutningsbanninu verði aflétt, sem vind um eyru þjóta og það sama á við um beiðnir líbanskra trúarleiðtoga.

Amfetamínið fannst á föstudaginn í höfninni í Jeddah. Töflurnar eru merktar captagon en þær hafa notið mikilla vinsælda víða í Miðausturlöndum á síðustu árum. Til dæmis hafa þær mikið verið notaðar af liðsmönnum hinna ýmsu stríðandi fylkinga í borgarstyrjöldinni i Sýrlandi.

Líbönsk yfirvöld fullyrða að það hafi ekki verið Líbanar sem smygluðu fíkniefnunum og segja að þau hafi komið frá Sýrlandi og hafi verið laumað í farminn. Það er vel þekkt mynstur í Miðausturlöndum og Norður-Afríku. Ibrahim Tarshishi, formaður landbúnaðarsamtaka í austurhluta Líbanon, fullyrðir að granateplin séu ekki einu sinni frá Líbanon og máli sínu til stuðnings bendir hann á að nú sé ekki uppskerutími granatepla og að þau hafi ekki verið flutt út árum saman.

Eftir sprenginguna miklu á höfninni í Beirút í ágúst á síðasta ári, þar sem rúmlega 200 manns létust og stór hluti borgarinnar eyðilagðist, hefur höfnin verið hálflömuð. Til dæmis hafa tollyfirvöld ekki haft skanna síðan og það hefur auðveldað smyglurum að athafna sig.

En landbúnaðarsamtökin í Líbanon telja að innflutningsbannið sé af pólitískum meiði. Sádí-Arabía noti það til að þrýsta pólitískt á yfirvöld í Líbanon. Ástæðan er að þeirra mati að Hizbollah, sem eru áhrifamikil hryðjuverkasamtök í Líbanon, eru nátengd Írönum sem eru aðalóvinir Sádí-Araba í Miðausturlöndum. Spenna á milli landanna hefur oft haft mikil áhrif á stjórnmálin í Líbanon og ákvarðanatöku.