Lögreglan í New York birti í morgun myndband af fólskulegri árás á götu úti í New York. Á myndbandinu má sjá er árásarmaðurinn, svört kona, ræðst, að því er virðist að ástæðulausu og fyrirvaralaust, að tveimur einstaklingum á 42. götu á Manhattan með hamri. Árásin átti sér stað klukkan 20:50 á sunnudagskvöld.
Hatursglæpadeild lögreglunnar í borginni rannsakar nú málið en engar handtökur hafa farið fram að svo stöddu. Fórnarlömbin eru báðar af asískum uppruna.
Fórnarlömbin eru 31 og 29 ára gamlar konur og slasaðist önnur þeirra í árásinni. Var hún flutt til aðhlynningar á sjúkrahús. „Ég var í áfalli,“ sagði konan í samtali við NBC New York. „Ég hef aldrei upplifað annað eins á ævi minni. Þetta hefur aldrei gerst.“
Árásarmaðurinn hvarf af vettvangi á hlaupum og er hún eftirlýst.
Aðeins örfáum klukkustundum áður en árásin átti sér stað höfðu hundruð komið saman í öðru hverfi borgarinnar til þess að mótmæla ofbeldisöldu gegn fólki af asískum uppruna. „Ef þú hatar, komdu þér þá út úr borginni. Þú átt ekki skilið að búa í New York,“ sagði Bill de Blasio, borgarstjóri New York, á fundinum.
Myndbandið sem lögreglan birti má sjá hér að neðan.
WANTED for ASSAULT: On 5/2/21 @ 8:40 PM, in front of 411 West 42 St two victims were walking on the sidewalk when they were approached by an unknown individual who assaulted them with a hammer. @NYPD10pct Any info call us @ 800-577-TIPS or DM NYPDTips Reward up to $2500. pic.twitter.com/gNbFlI4V6y
— NYPD Crime Stoppers (@NYPDTips) May 4, 2021
