Bild og Handelsblatt hafa þetta eftir heimildarmönnum í ríkisstjórninni. Reiknað er með að bóluefnið fái skilyrt markaðsleyfi nú í vikunni en það er að sögn heimildarmanna þýsku blaðanna ekki mjög áhrifaríkt hjá fólki 65 ára og eldra.
Þýska ríkisstjórnin telur að bóluefnið hafi aðeins 8% virkni hjá þessum aldurshópi að sögn Handelsblatt. Það þýðir að af 100 manns, sem hafa verið bólusettir, njóta aðeins 8 verndar gegn smiti.
AstraZeneca vísaði þessum fréttum þýsku blaðanna á bug í gærkvöldi og sagði fullyrðingar um að bóluefnið veiti eldra fólki litla vörn vera „algjörlega rangar“.
Ef áhrif bóluefnisins eru lítil mun það vera þungt högg fyrir bólusetningaráætlun þýsku ríkisstjórnarinnar.
AstraZeneca á einnig undir högg að sækja frá ESB eftir að fyrirtækið tilkynnti að það gæti ekki afhent eins mikið af bóluefninu næstu vikur eins og samið hafði verið um og bar við töfum í framleiðslu. Sagðist fyrirtækið að á fyrsta ársfjórðungi muni það því afhenda ESB 60% færri skammta en um var samið. Framkvæmdastjórn ESB hefur brugðist harkalega við þessu og krafið fyrirtækið um svör og segist vænta þess að staðið verði við gerða samninga.
Eric Mamer, talsmaður framkvæmdastjórnarinnar, sagði að ESB hafi samið við AstraZeneca í ágúst og greitt fyrirtækinu háar fjárhæðir, sem nemur um 50 milljörðum íslenskra króna, til að aðstoða fyrirtækið við að auka framleiðslugetu sína þannig að það væri vel í stakk búið til framleiðslu þegar bóluefnið fengi markaðsleyfi.
