Rússneskir íþróttamenn og lyfjanotkun er eitthvað sem mikið hefur verið fjallað um undanfarin misseri enda virðist sem rússneskir íþróttamenn stundi kerfisbundna notkun á ólöglegum lyfjum til að bæta árangur sinn. Í kjölfar Ólympíuleikanna í Sochi í Rússlandi komst upp að átt hafði verið við mörg sýni sem voru tekin úr rússneskum íþróttamönnum í tengslum við lyfjaeftirlit á leikunum. Í framhaldi af því fór lyfjahneykslið að vinda upp á sig. Rússneskir íþróttamenn hafa nú verið útilokaðir frá þátttöku í öllum alþjóðlegum mótum næstu tvö árin, þar á meðal Ólympíuleikum.

Í kjölfar lyfjahneykslisins hafa rússnesk yfirvöld sagt að nú verði tekið til í kerfinu en eitthvað virðist það ganga illa, að minnsta kosti er auðvelt að draga þá ályktun af nýlegum atburði.

Í desember fór rússneska meistaramótið í skíðaskotfimi fram í Izhevsk. Lyfjaeftirlitsmenn tilkynntu skyndilega komu sína á mótið og þá bar það til tíðinda að 33 ungir þátttakendur ákváðu skyndilega að hætta við þátttöku. Inside The Games skýrir frá þessu en miðillinn fylgist náið með ólympískum íþróttagreinum.

Eftir frétt miðilsins staðfesti rússneska lyfjaeftirlitið, Rusada, að 12 ungar konur og 21 ungur karlmaður hafi hætt við þátttöku og að verið sé að rannsaka málið. Rússneska skíðaskotfimisambandið hefur sömu sögu að segja og segir forseti þess, Viktor Maigourov, að þetta verði ekki látið óátalið.