Samfélagsmiðillinn Twitter heldur áfram að uppgjörinu við dreifingu lyga, samsæriskenninga og rangra upplýsinga með því að loka aðgöngum sem hafa verið notaðir í þessu skyni. Frá því á föstudaginn hefur miðillinn lokað rúmlega 70.000 aðgöngum sem hafa aðallega verið notaðir til að dreifa samsæriskenningum og öðru efni frá samsæriskenningahreyfingunni QAnon.

Gripið var til þessara aðgerða í kjölfar árásarinnar á bandaríska þinghúsið í síðustu viku. Þar voru margir af leiðtogum QAnon í áberandi hlutverkum.  „Þessir aðgangar voru helgaðir því að deila hættulegu efni tengdu QAnon í miklum mæli,“ segir meðal annars í tilkynningu frá Twitter.

Stuðningsfólk QAnon hefur notað samfélagsmiðla í miklum mæli til að breiða út samsæriskenningar. Meðal annars um að Donald Trump berjist leynilega gegn alþjóðlegu neti barnaníðinga. Í hópi þessara barnaníðinga eru að sögn QAnon margir áhrifamenn í Demókrataflokknum og Hollywoodstjörnur.

Twitter tilkynnti á föstudaginn að lokað verði á aðganga sem deila efni frá QAnon. Miðillinn hefur einnig lokað á marga áberandi aðila á hægri væng bandarískra stjórnmála sem hafa kynt undir samsæriskenningum og kenningum QAnon.