Sænsk yfirvöld höfðu hvatt Svía til að ganga hægt og rólega um gleðinnar dyr um áramót og huga að sóttvörnum, virða reglur um hámarksfjölda og forðast ónauðsynlega dreifingu kórónuveirusmita. Það er ekki að ástæðulausu að fólk var hvatt til þess að hafa hægt um sig því kórónuveirufaraldurinn hefur verið nær stjórnlaus í landinu að undanförnu og dánartölur hækka mikið á hverjum degi.

En það er óhætt að segja að margir hafi látið þetta sem vind um eyru þjóta og hafi bara gert það sem þeim sýndist í gærkvöldi og nótt, að minnsta kosti ef miða má við annríkið hjá lögreglunni víða um land. Aftonbladet segir að í Stokkhólmi og á Gotlandi hafi lögreglunni borist tvisvar sinnum fleiri erindi varðandi flugelda en árið áður. Í Gautaborg söfnuðust mörg þúsund manns saman til að skjóta upp flugeldum um miðnætti.

Í mörgum bæjum og borgum skutu ungmenni flugeldum að lögreglunni.

Á Skáni bárust lögreglunni um 900 beiðnir frá almenningi frá klukkan 18 til 05.30 en það eru tvöfalt fleiri beiðnir en á venjulegum degi.