Í nýlegri umfjöllun Danska ríkisútvarpsins, DR, um málið kemur fram að ef horft er á tölfræðina vakni ákveðnar spurningar um hollustu mjólkurvara. Í Skandinavíu sé mjólkurneyslan sú allra mesta í heiminum en um leið séu það þessar þjóðir sem upplifa flest beinbrot og beinþynningu.
Liisa Byberg, lektor í faraldsfræði við Uppsala háskóla í Svíþjóð, sagði í samtali við DR að það sé ekki svo auðvelt að svara því hvort mjólk sé holl eða óholl. Hún hefur nýlega birt fræðigrein þar sem reynt er að skoða tengsl mjólkurvara og beinanna út frá fleiri sjónarhornum.
„Það er of einfalt að spyrja hvort mjólkurvörur séu hollar eða óhollar fyrir beinin. Mismunandi mjólkurvörur og magn geta haft mismunandi áhrif,“
hefur DR eftir henni.
Hún rannsakaði sænska tölfræði fyrir heilbrigði og mjólkurneyslu árið 2014 og komst að því að svarið um hollustu mjólkur og áhrif hennar á bein okkar er flókið. Til dæmis kom í ljós að mikil neysla á kúamjólk tengist auknum líkum á mjaðmagrindarbrotum. Á móti sýndi rannsóknin að neysla á sýrðum mjólkurvörum á borð við jógúrt dró úr líkunum á mjaðmagrindarbrotum. Það eru því mismunandi áhrif á milli ólíkra mjólkurvara.
Hún sagði að það sé óvenjulegt að skipta mjólkurvörum upp og skoða áhrif hverrar tegundar fyrir sig en það geti skýrt hversu erfitt er að útskýra af hverju er svo erfitt að svara já eða nei þegar spurt er um hollustu mjólkurvara.
Hún benti einnig á að þegar tölfræði sýni til dæmis að Svíar drekki mest allra af mjólk en beinbrotni einnig oftast þá fáist engin niðurstaða úr því. Ástæðan sé að þeir sem drekka minna af mjólk hafi hugsanlega neytt annarra mjólkurvara í staðinn.
