Líbanska brúðurinn Israa Seblani gleymir brúðkaupsmyndbandinu sínu varla í bráð og líklega aldrei. En ekki af sömu ástæðu og fólk man yfirleitt eftir slíkum myndböndum og myndatökum.  Á þriðjudaginn stillti hún sér upp á götu úti í Beirút í Líbanon þar sem myndbandið var tekið upp. En á sekúndubroti breyttist hamingjustundin í algjöran hrylling.

Gríðarleg sprenging skók borgina en eins og fram hefur komið í fjölmiðlum þá létust að minnsta kosti 135 manns í sprengingunni og um 5.000 slösuðust. Eyðileggingin er gríðarleg og um 300.000 manns eru heimilislausir.

Seblani og brúðguminn ræddu við Reuters eftir að myndbandið fór á flug á netinu.

„Ég var búin að undirbúa mig undir stóra daginn minn í tvær vikur og eins og allar aðrar konur var ég mjög glöð. Ég var að fara að giftast, foreldrar mínir áttu að sjá mig í hvíta kjólnum og ég vildi líkjast prinsessu. Það eru engin orð sem geta lýst hvað gerðist í tengslum við sprenginguna. Ég var í miklu áfalli og skildi ekki hvað hafði gerst. Átti ég deyja?“

Sagði Seblani sem sagðist ekki muna mikið eftir atburðinum. Brúðhjónin höfðu ætlað að setjast að í Líbanon en íhuga nú að flytja til  Bandaríkjanna en Seblani er með bandarískan ríkisborgararétt.